Харь улсад ажиллаж, сурч амьдарч байгаа сонгуулийн насны иргэд өөрийн оршин суугаа оронд байрлаж буй Дипломат төлөөлөгчийн газарт 2012 оны зургадугаар сарын 10-ны өдрийн орон нутгийн цагаар 07-20 цагт өөрийн биеэр очиж сонгууль өгнө. Ингэхдээ УИХ-ын сонгуульд оролцож буй 11 нам, хоёр эвслийн төлөө саналаа өгнө. Монгол Улсаас хилийн чанадад суугаа 39 Дипломат төлөөлөгчийн газарт тавдугаар сарын 11-нээс санал өгөх хүсэлтэй иргэдийг бүртгэж эхэлсэн. Тавдугаар сарын 25-ны байдлаар гэхэд 2005 сонгогч сонгуульд оролцох хүсэлтэй байгаагаа илэрхийлж өргөдлөө өгчээ. Харин энэхүү бүртгэлийн хугацаа тавдугаар сарын 30 буюу маргааш орон нутгийн цагаар 18 цаг хүртэл үргэлжээд дуусах юм байна.