Монгол улсын гавьяат жүжигчин, поп хатагтай Б.Сарантуяатай холбогдож цөөн асуултад хариулт авлаа.

-Саяхан Европоор тоглолтоо хийгээд ирсэн. Энэ удаагийн аялан тоглолтын онцлог юу байсан бэ?
-Европын гурван орноор 14 хоногийн турш “Unforgettable” буюу “Мартахгүй” аялан тоглолтоо хийгээд саяхан ирлээ. Өмнөх аялан тоглолтуудаас онцлог зүйл гэвэл энэ удаад Лондонгийн элчин сайдын яам, Монголчуудын холбооны санаачилгаар эртний театрт тоглолоо. Ажлын өдөр тоглох байсан учраас хүмүүс үзэх болов уу гээд санаа зовж байсан ч Норвегаас ирэхэд аль хэдийнэ билет дууссан байсан.
-Бас хэдхэн хоногийн өмнө Монголын үзэгчиддээ тоглолт хийсэн...?
-Уржигдар Facebook-ийн найзуудынхаа хүсэлтээр Iloft-д “Сэтгэл хөдөлгөсөн үдэш” тоглолтоо хийлээ. Өмнө нь яг ийм сайхан фэнүүдтэйгээ дотно харьцсан тоглолт хийж байгаагүй юм байна. Тоглолт сайхан болсон.
-Таны шавь Л.Насанбуян UBS телевизийн “Universe best songs” уралдаанд оролцож байгаа. Энэ талаар..?
-Дуучин хүн ямагт өөрийгөө сорьж, дайчилж байх хэрэгтэй. Анх би Насаад энэ санааг хэлсэн юм. Хамгийн гол нь гадаадын урлагийн сургуульд үнэ төлбөргүй суралцах гэдэг шагнал нь таалагдсан. Сая надтай Европоор тоглож байгаад ирсэн. Удахгүй болох гала тоглолтынхоо бэлтгэлийг хийгээд л байж байна. Минийх хувьд чадахаараа зааварлаад л явж байна.