2013 онд 1672 компани ашигт малтмалын, 14 компани цацраг идэвхт ашигт малтмалын тусгай зөвшөөрөл авсан бол 13 компани газрын тосны бүтээгдэхүүн хуваах гэрээ эзэмшсэн гэж Олборлох үйлдвэрлэлийн ил тод байдлын санаачилга (ОҮИТБС)-ын Үндэсний зөвлөлөөс өчигдөр мэдээллээ. Ерөнхий сайдаар ахлуулсан тус зөвлөл 30 гишүүнээс бүрддэг бөгөөд 2013 онд нийт 1699 компанийн тайлан хүлээн авах байсан ч тэдний 1198 нь тайлангаа хүргүүлжээ.

Тайланд дурдсанаар дээрх компаниудын 250 нь улсад жилд 40-өөс дээш төгрөгийн татвар төлсөн бол 20 нь нийт төлбөрийн 93 хувийг дангаар бүрдүүлсэн  байна. Харин улсад төлсөн нийт төлбөр нь 1.5 их наяд төгрөгөөр хэмжигдэж байгаа бөгөөд үүний  31 хувийг нь ашигт малтмалын нөөц ашигласны төлбөрөөс, 18 хувийг аж ахуйн нэгжийн орлогын албан татвараас, 12 хувийг нь бүтээгдэхүүн хуваах гэрээний дагуу Засгийн газарт ногдох орлогоос үлдсэн 11 хувийг нэмүү өртгийн албан татвараас бүрдүүлжээ. Харин Засгийн газар 1.5 их наяд төгрөгийн 92 хувийг улсын төсөвт, таван хувийг орон нутгийн төсөвт хуваарилсан байна.

Мөн “Эрдэнэт” үйлдвэр 1.5 их наядын 32 хувийг төсөвт оруулж тэргүүлсэн бол Оюу толгой 13 хувийг, Петрочайна дачин тамсаг 12 хувийг бүрдүүлснээр удаалжээ.