2014 он цаг уурын түүхэнд тэмдэглэгдсэн хамгийн дулаан жил боллоо гэж АНУ-ын судлаачид мэдэгдэж байна. Өнгөрсөн оны дундаж температур олон жилийн дунджаас 0,68 хэмээр дулаан байжээ. Зөвхөн температур гэлтгүй цаг уурын рекорд тогтоох олон үзэгдэл 2014 онд тэмдэглэгджээ. Тухайлбал, өнгөрсөн есдүгээр сард Туркт жилийн дунджаас дөрөв дахин их хур тунадас орсон бол Морокогийн Гуелмин хэмээх хотод нэг жилд буудаг хур тунадас нь дөрөвхөн өдрийн дотор цутгах мэт орсон байна. Мөн Японы баруун хэсэгт өнгөрсөн наймдугаар сард ер бусын их бороотой байснаараа рекорд тогтоосон бол зарим газар болдог халуун орны шуурга олон жилийн дунджаас /89-өөс/ 72 болтлоо буурчээ.