Дорнод аймагт гарсан түймрийг унтрааж яваад түлэгдэн, эмнэлэгт эмчлүүлж байгаад нас барсан тус аймгийн Онцгой байдлын хэлтсийн ахлах ахлагч Г.Багабишийн ар гэрт тэтгэмж өгөхөөр Засгийн газрын хуралдаанаас шийдвэрлэлээ. Мөн дэд ахлагч А.Болорсүхийн БНСУ-д эмчлүүлэх зардалд зориулан 240 сая 151 мянган төгрөг гаргахаар болсон байна. Түүнчлэн Дорнод, Сүхбаатар аймагт гарсан хээрийн болон объектийн түймэрт өртөн орон гэргүй болсон 36 өрхөд улсын нөөцөөс иж бүрэн гэр өгөхөөр шийдвэрлэсэн байна. Энэ оны дөрөвдүгээр сарын 18-24-ний өдөр Дорнод аймгийн Баян-Уул, Гурванзагал, Дашбалбар, Сэргэлэн, Чойбалсан, Чулуунхороот, Халх гол, Хэрлэн сум, Сүхбаатар аймгийн Мөнххаан, Түвшинширээ суманд түймэр гарсан юм.