Улсын дээд шүүх Хамуг Монголын хөдөлмөрийн намын дүрмийн өөрчлөлт, Монголын либерал намын даргын өөрчлөлтийг улсын бүртгэлд тусгуулах хүсэлтийг хэлэлцлээ.  Хамуг Монголын хөдөлмөрийн намынхан II бага хурлаараа ХМХН-ын дүрмийн 2.3 дахь заалтыг “Хамуг Монголын хөдөлмөрийн намын далбаа нь хөх, улаан, хөх гэсэн хоёр өнгөтэй байх ба урт өргөн нь 2:1 харьцаатай байна. Зүүн талын хөх өнгө нь “Хөх Монгол”-ыг, дунд улаан нь “Бүтээн байгуулалт”-ыг, баруун талын хөх өнгө нь “Хамуг Монгол”-ыг бэлгэднэ. Далбааны голын улаан дээр Хамуг Монголын хөдөлмөрийн намын бэлгэдэл байрлана” гэж өөрчлөхөөр шийдвэрлэсэн байна. Мөн “Нам аливаа сонгуульд эвсэлд нэгдэн орсон тохиолдолд эвслийн гэрээ нь тухайн сонгууль, түүний үр дүнд байгуулагдсан УИХ-ын бүрэн эрхийн хугацаанд хүчин төгөлдөр байх бөгөөд эвслээс гарах эсэх асуудлыг зөвхөн намын ээлжит их хурлаар шийдвэрлэнэ” гэсэн заалтыг намын дүрмийн 20 дугаар бүлгийн 1.14 заалт болгон нэмж оруулахаар шийдвэрлэжээ. Улсын дээд шүүх Хамуг Монголын хөдөлмөрийн намын дүрэмдээ оруулсан эдгээр өөрчлөлт нь хуульд нийцэж байна хэмээн үзэж улсын бүртгэлд бүртгэсэн байна.
Түүнчлэн Монголын Либерал намын Удирдах зөвлөл энэ сарын 13-нд хуралдаж, намын даргаар Б.Дашзэвэг, нарийн бичгийн даргаар Н.Цогтбаатар нарыг сонгожээ. Тэд намын даргаа өөрчилснөө улсын бүртгэлд бүртгүүлэхээр хүсэлт гаргасныг тус шүүхийнхэн хэлэлцээд мөн хуульд нийцэж байна гэж үзээд бүртгэжээ.