Монгол Улсын Ерөнхийлөгчийн Тамгын газар, Хоган Ловеллс Олон улсын хуулийн компани, Монголын банкны холбоотой хамтран ирэх долоо хоногт Улаанбаатар хотноо “Эдийн засгийн өгөөжтэй өсөлт ба эрх зүйн шинэтгэл” олон улсын чуулган зохион байгуулах аж. “Их Тэнгэр” цогцолборт болох уг чуулганд гадаад дотоодын хуульч, бизнесийнхэн, төрийн байгууллагын төлөөлөл болсон нийт 200 гаруй хүн оролцоно. Монгол Улсын эрх зүйн шинэтгэлийн хүрээнд хурдацтай өсч буй эдийн засаг, бизнесийн орчны хууль эрхийн зохицуулалт ямар байгаа талаар хэлэлцэхээр төлөвлөжээ. Түүнчлэн чуулганы хэвлэл мэдээллийг “Файнаншл Таймс” сонин, “Блүмберг” телевиз сурвалжлан хүргэх гэнэ. Өнгөрсөн жил зохион байгуулж байсан “Шүүх эрх мэдлийн шинэчлэл ба шудрага ёс” үндэсний чуулганы үргэлжлэл нь энэхүү чуулган юм байна.
Чуулганы үеэр дотоодын төдийгүй олон улсын хэмжээнд Монголын хууль эрх зүй, бизнесийн орчны тодорхой асуудлуудыг хөндөх хэд хэдэн салбар хуралдаан болно.