Сүхбаатар дүүргийн шүүх Сэлэнгэ аймгийн Мандал сумын Засаг дарга Б.Цээпилдорж, тус сумын Мэргэжлийн хяналтын байцаагч Н.Нямдаваа нарт холбоотой хэргийг хэлэлцээд нэмэлт мөрдөн байцаалтад буцаалаа. Тэднийг эрх мэдлээ хэтрүүлэн ашиглаж, уул уурхайн компаниудад зөвшөөрөл олгосон, ойн тухай хууль тогтоомж зөрчин, байгаль экологид онц их хэмжээний хохирол учруулсан гэж буруутгаж байгаа гэнэ.
Мандал сумын иргэд Засаг дарга болон мэргэжлийн хяналтын байцаагчаа “Сентерра гоулд”, “Бороо гоулд” компанид хууль бусаар зөвшөөрөл олгосноор байгаль орчин сүйдэж, хүн амьдрахын аргагүй болж байна хэмээн шүүхэд нэхэмжлэл гаргасан аж. Шүүх эл нэхэмжлэлийг хэлэлцээд дээрх хоёр албан тушаалтны буруугаас болж хэчнээн хэмжээний хохирол учирсныг нарийвчлан тогтоох шаардлагатай гэж үзээд хэргийг нь нэмэлт мөрдөн байцаалтад буцаажээ.