Экс Ерөнхийлөгчийн этгээд ааш аврыг олон нийтэд ил болгосноор шинэ моод дэлгэрч эхэлжээ. АТГ-ынхан ялын тогтоолыг танилцуулахад “Сонсохгүй байна…” гээд чихээ таглаж, амандаа чанга чанга ярьж байсан бичлэг интернэтийн хайлтаас хамгийн их үзсэн видеогоор тодрох биз. Тиймдээ ч сонсохыг хүсэхгүй зүйлээ экс Ерөнхийлөгч шиг илэрхийлдэг болоод байгаа. “Facebook”, “Twitter-“ийн сүлжээгээр түүнийг дуурайсан хошигнол ч газар авч байна.
Харин өнгөрсөн долоо хоногийн гол сенсаац болсон эксийн дараагийн бичлэг бас нэг шинэ моодыг дэлгэрүүлэв. “Би Монгол Улсын Ерөнхийлөгч чинь байна… та нар муу сайн юмнууд юу вэ” гэж омогдох түүний ааш авир хит үг хэллэг болжээ. Үүнийг нь зарим хүн Энхбаярдах моод дэлгэрчлээ гэж тайлбарлах болов. Ямартай л жүжигчин Чапи “Twitter” хуудсандаа “Яг одоо бүх жиргээчдийг намайг дага гэж хэл мэд үү хөөе, одоо дууд аа. Монгол Улсын жүжигчин дуудаж байна гэж хэлээдэх би айхгүй шүү за ха ха” гэж бичсэн байв. “Жудагтай” экс Ерөнхийлөгчийн гутамшигтай үйлдийг удахгүй хошин шогийн жүжигчид дуурайж, элэглэж, эрэлттэй үзүүлбэр болгох байх даа.