Японы Хоншү арлын өмнөд хэсэгт өчигдөр 5,6 магнитудын газар хөдлөлт болсон байна. Газрын чичиргээ нь Фүкүшима, Токио зэрэг 25 мужид мэдрэгдэж байжээ. Цунамийн аюул байхгүй гэдгийг шинжээчид онцолсон ч олон тооны дагалдах жижиг газар хөдлөлт болж магадгүй гэж иргэддээ анхааруулав.
2011 оны газар хөдлөлтийн улмаас гэмтсэн "Фүкүшима-1” цөмийн цахилгаан станцад энэ удаагийн газар хөдлөлтөөр ямар нэгэн гэмтэл гараагүй тухай эзэмшигч компани нь мэдэгдлээ.
Газар хөдлөлтийн улмаас Гумма, Сайтама мужид хоёр хүн хөнгөн шархадсанаас өөр хүн гэмтэж, бэртээгүй тухай “NHK” суваг мэдээлэв.
Сүүлийн үед Ази тивд, бүр тодруулбал Индонези, Иран, Афганистан, Киргиз, Тажикистан зэрэг улсад удаа дараалан газар хөдөлсөн. Японд үүнээс өмнө буюу есдүгээр сарын 11-нд таван магнитудын хүчтэй газар хөдлөлт бүртгэгдсэн. Үүний дараагаар Японтой ойролцоох Оросын Камчаткад Шивелуч, Карымский, Жупановский, Безымянный гэсэн дөрвөн том галт уул идэвхжсэн байна.
