Энэ сарын 5-ны өдөр Оросын Екатеринбург хотын жуулчид нисэхийн “Трансаэро” компанийн UN-932 чиглэлийн Boeing онгоцоор Барселоноос ирж явтал хөдөлгүүрт нь гал гарч шатаж эхэлсэн байна. Нэг зорчигч сүлжээнд бичсэнээр бол нисч байх үед нь гэнэт их буугаар буудах шиг чанга чимээ гарч онгоц хүчтэй доргисон байна. Ингээд л хартал зүүн хөдөлгүүр нь шатаж байжээ. Зорчигчид харин шуугилдаж, хашгиралдаагүй нам гүм болж нисгэгчид зүүн хөдөлгүүрээ унтраагаад ганц хөдөлгүүрээрээ нислэгээ үргэлжлүүлсэн” гэж бичсэнийг Ura.ru  сайт иш татан бичсэн байна.
Нэг хөдөлгүүргүй онгоцыг нисгэгчид шууд буцааж нисэх буудалд буулгахаар ниссэн боловч нисэх буудалд шууд бууж болоогүй байна. Ингэснээр 171 зорчигчтой онгоц далай дээгүүр нэг цаг хэртэй тойрон нисчээ.
“Хөлгийн дарга бидэнд далай дээгүүр 50-60 минут л нисээд  нисэх буудалд бууна гээд ослын тухай ямар нэгэн юм хэлээгүй. Магадгүй тэд хөдөлгүүрт яагаад гал гарсныг тайлбарлах хэрэггүй ч байсан байж болох юм” гэж Николай гэдэг зорчигч бичжээ.
Барселоны нисэх буудалд онгоцыг гал сөнөөгч, аврах албаныхан угтсан байна. Азаар нисэх багийнхан, зорчигчдоос хэн ч бэртэж гэмтээгүй байжээ.
Нисэхийн компани ослын шалтгааныг тогтоохоор тусгай комисс томилсон гэж мэдээлсэн байна.