Шаардлагатай бол дээрх холбооноос гарах тухай мэдэгдэлийг Казахстаны Ерөнхийлөгч Нурсултан Назарбаев хийжээ. Евразийн эдийн засгийн холбоонд ОХУ, Казахстан, Беларусь байдаг. Ойрын хугацаанд энэ холбоонд Армени, Киргиз улс нэгдэж магадгүй аж. Казахстан, Орос хоёр энэ байгууллагыг байгуулахад шийдвэрлэх үүрэг гүйцэтгэж, олон жилийн найрсаг харилцаатай түншүүд болсон юм. Ийм байтал Казахстан энэ холбооноос гарна гэхээр Оросын хувьд геополитикийн том ялагдал, холбооны хувьд гүн хямрал нүүрлэж болзошгүй. Яагаад гэнэт ийм мэдэгдэл хийх болсон нь хачирхалтай.

Хэргийн эзэн нь ОХУ-ын Ерөнхийлөгч В.В.Путин өөрөө болж байгаа бололтой. Наймдугаар сарын 29-нд Путин өөрийн намын дэмжигч залуучуудын өмнө үг хэлэхдээ Назарбаевыг “Урьд нь улс огт байгаагүй газар нутаг дээр улс байгуулсан” гэж мэдэгдсэн байх юм. Зөвлөлтийг задран унасны дараагаар шинэ үеийн түүхэнд анх удаа казахуудыг нэгтгэн улс байгуулсан. Казахстан иймэрхүү мэдэгдэлд их эмзэг ханддаг.

Назарбаев “Хэрэв гэрээнд урьд нь зааж тогтоосон дүрмийг гүйцэтгэхгүй байгаа бол Казахстан Евразийн эдийн засгийн холбооны гишүүнчлэлээс татгалзах бүрэн эрхтэй. Манай улс тусгаар тогтносон байдалд минь заналхийлэл учруулж буй байгууллагын бүрэлдэхүүнд хэзээ ч байхгүй. Эцэг, өвгөдийн минь тэмцсээр ирсэн Казахстан улсын тусгаар тогтнол бидний хамгийн үнэт зүйл. Нэгдүгээрт, бид хэзээ ч тусгаар тогтнолоо өгөхгүй, хоёрдугаарт тусгаар тогтнолоо хамгаалахын тулд би боломжтой бүхнийг хийнэ” гэжээ. Үүнийг Казахстаны иргэд Украинд болсонтой адил үйл явдал болох нь гэж үзээд “Путинд түүхийн сурах бичиг явуулъя” нэртэй арга хэмжээ зохион байгуулсан талаар “Эхо Москвы” радио станц мэдэгдсэн байна.