Замын хөндлөн гарч явсан 12 настай Б.Есүгэн охин барилгын компа­нийн хариуцлагагүй үйлд­лийн улмаас нас барсан хэрэг одоогоос хоёр жилийн өмнө гарсан. Дээрх хэргийн шүүх хурал энэ сарын 4-ний өдөр Дүүргийн эрүүгийн хэргийн анхан шатны шүүхэд болж өнгөрлөө. Өмнө нь буюу өнгөрсөн оны долдугаар сард энэ хэрэгтэй холбоотой анхан шатны шүүх хурал болж, хэрэгт холбогдогч нарт 1-2 жилийн ял оноож бай­сан ч талийгаач охины эцэг, эх үл зөвшөөрч давж заалдах шатны шүүхэд гомдол гаргасан юм. Ингэснээр Нийслэлийн шүүх хэргийг хэлэлцээд нэмэлт мөрдөн байцаалтад буцааснаар энэ удаад анхан шатны шүүх хоёр дахь удаагаа хэргийг шүүсэн нь энэ. Тодруулбал, Хэрэгт хол­бог­дуулан Г.Ган­төмөр нарын зургаан хүнийг хөдөлмөрийн аюулгүй ажиллагааны дүрэм зөрчсөн хэмээн үзэж, яллах дүгнэлт үйлдээд байсан. Харин шүүх хуралдаанаар Г.Гантөмөр нарт холбогдох эрүүгийн хэргийг хянан хэлэлцээд, шүүг­дэгч Б.Дашням, Д.Болд, Б.Са­ран­хүү, Г.Гантөмөрт, Б.Буян­тэгш, О.Батмөнх на­рыг Эрүүгийн хуулийн тус­гай ангийн 183 дугаар зүй­лийн 183.1-т зааснаар гэм бу­руу­тайд тооцож, шүүгдэгч Г.Ган­тө­мөр, Б.Дашням нарыг тус тус 1.6 жилийн хорих ял, шүүг­дэгч Д.Болдыг  барилгын үйл ажиллагаа явуулах эрхийг хоёр жилийн хугацаагаар хасч хоёр жилийн хорих ял оногдуулж, эрүүгийн хуулийн ерөнхий ангийн 52 дугаар зүйлийн 52.5 дахь хэсэгт зааснаар жирийн дэглэмтэй эрэгтэйчүүдийн хорих ан­гид ял эдлүүлэх боллоо. Харин шүүгдэгч Б.Саранхүү, Б.Буян­тэгш, О.Батмөнх нарт барилгын үйл ажиллагаа явуулах эрхийг хоёр жил хасч, хөдөлмөрийн хөлсний доод хэмжээг 100 дахин нэмэгдүүлсэнтэй тэнцэх хэмжээний буюу 14 сая 40 мянган төгрөгөөр торгох ял тус тус оногдууллаа.
Хэрэг гарахдаа “Сетунари” компанийн “Буянт оношлогоо” эмнэлгийн гадна фасад, төмөр хашаа, рекламын самбар зэргийг гэмтээж 5.8 сая төгрөг, “Цахилгаан тээвэр” компанийн шугмын даацын шонг тахийлган сүлжээний ган татлагыг таслаж 2.9 сая төгрөг, Х.Намжилдоржийн эзэмшлийн 27-09 УНН улсын дугаартай “Тоёото Пропокс” маркийн машиныг гэмтээж 2.7 сая төгрөгийн хохирол тус тус учруулсан гэж шүүх үзжээ.