Сонгуульд нэр дэвших нам эвсэл, бие даагчдын сонгуулийн сурталчилгаа эхэлжээ. Хэдийгээр СЕХ-ноос албан ёсоор сонгуулийн сурталчилгааг эхлүүлээгүй байгаа ч нэр дэвшигчид далд сурталчилгаа явуулж байгаа аж. Тухайлбал, Увс аймгийн иргэдийг төлөөлж УИХ-д дөрвөн удаа суугаад буй ХЗДХ-ийн сайд Ц.Нямдорж энэ жилийн сонгуулиар “Төрийн хар хүн” гэж овоглохоор болжээ. Үүнийгээ УИХ-ын чуулганы нэгдсэн хуралдаанд ил тод хэлээд авна билээ. Тухайлбал, УИХ-ын гишүүн С.Эрдэнэ, “Нямдорж сайд аа. Та төрийн хар хүн байж төрийн ажлыг дандаа хойш нь татах юм” гэж хэлэхэд, “Намайг Төрин хар хүн гэж өргөмжилж байгаад баярлалаа. Би үүнийг ирэх сонгуулиар ашиглаж, сурталчилгааныхаа гол уриа болгоно” гэв. Магадгүй тэрээр, “Хэл аманд орооцолдсон ч нэр нь хугардаггүй төрийн хар хүн Ц.Нямдорж оо” гээд явж байж мэдэх.