“Богд хаан” киноны Богдын дүрд тоглож Соёлын тэргүүний ажилтан цол хүртсэн жүжигчин Ч.Болдтой “Үгийн солио” булангаараа холбогдлоо.

-Богдын дүрээрээ  “Academy awards”-ын шилдэг эрэгтэй гол дүрийг авчих байх гэж найдаж байлаа. Гэхдээ таны тоглосон “Богд хаан” кино гран при авч чадлаа?
-Сэтгэл өндөр байна аа. Миний хувьд шилдэг гол дүрийн шагналыг аваагүйдээ харамсах ч үгүй байгаа шүү. Яагаад гэвэл Амараа маань үнэхээр шилдэг нь байж чадсан. Тэгээд ч түүнд шилдэг эрэгтэй гол дүрийн шагнал өгсөн нь шүүгчид хэр шударга шүүснийг харуулж чадлаа гэж бодож байна.
 
-Таныг олон ангит кинонд тоглож байгаа гэх юм. Энэ талаараа сонирхуулахгүй юу?
-МҮОНТ-ээс хийж буй 60 ангитай хилийн цэргийн 80 жилийн ойд зориулсан “Босго тотго” гэдэг киноны гол дүрийг бүтээж байгаа юм.

-Хэзээ нээлтээ хийх юм бол?
-Зураг авалт эхлээд удаагүй байна л даа. Хэд хоногийн өмнө Дорнодод зургаа авсан. Удахгүй Говь-Алтай аймаг руу, есдүгээр сард Халх гол явах гээд ажил мундахгүй их бий. Дайны сэдэвтэй бодит түүхэн кино юм л даа. Нийт 12 бүлэг 60 ангитай. Би таван бүлэгт нь тоглоно. Энэ кино зургийг дөрвөн улирал дамнан төлөвлөгөөтэй байгаа учраас энэ жил нээлтээ хийж амжихгүй.