Сонгуулийн ерөнхий хорооны таван гишүүний бүрэн эрхийн хугацаа дууссан тул нөхөн сонгогдож өнөөдөр тангарагаа өргөлөө. Таван гишүүний дөрвийг нь УИХ-аас, нэгийг нь Монгол Улсын Ерөнхийлөгч санал болгодог байна. УИХ-ын зүгээс
Н.Дагва, Г.Гэрэлт-од, Б.Ганбат, Д.Эрдэнэчулуун нарыг санал болгосон бол Монгол Улсын Ерөнхийлөгч Б.Билэгтийг санал болгожээ. Дээрх таван хүн Монгол Улсын Үндсэн хууль, сонгуулийн хууль тогтоомжийг дээдлэн сахиж, Сонгуулийн Ерөнхий Хорооны гишүүний үүргээ шударгаар биелүүлэхээ тангараглав.
Тангараг өргөх ёслолын ажиллагаанд  оролцсон Улсын Их Хурлын дарга Д.Дэмбэрэл  Сонгуулийн Ерөнхий Хорооныхонд хандаж хэлсэн үгэндээ, Сонгуулийн Ерөнхий Хороо түүний гишүүд төрийг төвхнүүлэхэд өндөр үүрэг, хариуцлага хүлээж байгааг онцлон тэмдэглээд  энэ удаагийн сонгуулийг зохион байгуулахдаа хуулийг чандлан баримтлахын сацуу хуулийг сайтар ойлгуулж тайлбарлаж ажиллах нь чухал байна. Ялангуяа иргэний нийгмийн байгууллага, иргэдтэйгээ хамтран ажиллаж байж сонгууль шударга, маргаангүй явагдах боломжтойг тэрээр онцолж хэллээ.