Монгол Улсын Засгийн газрын тэргүүн, Байгаль орчин, аялал жуулчлалын яамныхан болон “Лондон 2012” олимпийн наадамд оролцох баг тамирчдын төлөөлөл Дархан цаазат Богдхан ууланд мод тарьж, олимпын нэрэмжит төгөл байгууллаа. 5000 орчим тарьц суулгацтай төгөлөө хашаалж хамгаалсан байна.
Ногоон хөгжлийг дэмжих чиглэлээр Монгол Улсын Засгийн газраас дэвшүүлж буй зорилтыг олон улсын хэмжээнд хөхиүлэн дэмжих, сурталчлахаар дэлхийн эв нэгдлийн илэрхийлэл болсон олимпын наадамд манай баг тамирчид “Ногоон хөгжлийн төлөө” уриатайгаар оролцох гэж байгааг Монгол Улсын Ерөнхий сайд С.Батболд бүх нийтээр мод тарих энэ өдөр мэдэгдэн, дархан цаазат Богдхан уулын Энхтайваны аманд тамирчдад батламж гардуулав.


Богдхан уул манай улсын хамгийн анхны (1778 он) дархан цаазат уул. Байгаль орчиндоо хүйтэн сэтгэлээр хандвал яаж сүйдэж, нүд хальтрам болдгийг энэ нүцгэрсэн уулын ам нотолж байна. Богдхан уулаа ургамал мод тэгширсэн сайхан болгохын төлөө хамтдаа цуглаад мод тарилаа гэж Ерөнхий сайд хэллээ. Мөн бид өвөг дээдсээсээ онгон дагшин байгаль дэлхий хүлээж авсан. Хойч үеийнхэндээ унаган төрхөөр нь хүлээлгэж өгөх үүрэг хүлээсэн хүмүүс. Энэ үүргээ биелүүлэхийн тулд заавал их томыг амлах хэрэггүй. Байгаль дэлхийдээ хайртай байж, түүнд чин сэтгэлээсээ хандаж, мод тарихад л болох юм гэдгийг Засгийн газрын тэргүүн С.Батболд онцолж байлаа.

Богдхан ууланд Олимпийн төгөл байгуулахад БОАЖЯ, Ойн газар, Богдхан уулын ДЦГ-ын хамгаалалтын захиргааны хамт олон бүрэлдэхүүнээрээ оролцсон. Уулын зам бартаатай, цаг агаар хүйтэн байсан ч түүртэлгүйгээр байгуулсан ойн төгөлд маань ирэх жилүүдэд тамирчид мод тарьж, байгаль эхийг баясгах үйлсийг буухиална гэдэгт итгэлтэй байна.