МАХН-ын дарга Н.Энхбаярын талаар ЦЕГ, ШШГЕГ хамтарсан мэдээлэл хийлээ. Н.Энхбаярын хувьд хуурай өлсгөлөн зарлаад 100 гаруй цаг болжээ. Эрүүл мэндийн яамнаас томилогдсон нарийн мэргэжлийн эмч нарийн дүгнэлтээр эмнэлгийн орчинд, шаардлагатай эмчилгээг цаг алдалгүй хийх тухай эмч нарийн дүгнэлтийг үндэслэн түүнийг 14 цагийн орчимд II эмнэлэгт хүргэсэн байна. Харин түүнийг таслан сэргийлэх, цагдан хорих ажиллагаа хэвээр байгаа гэдгийг албаныхан дуулгалаа. Учир нь, түүний таслан сэргийлэх арга хэмжээг өөрчлөх тухай шүүхийн шийдвэр гараагүй учраас эмнэлэгт цагдаагийн харуул хамгаалалтад эмчилгээгээ хийлгэх аж.

Энэ үеэр ШШГЕГ-ын хэлтсийн дарга дэд хурандаа Очгэрэлээс цөөн асуултад хариу авлаа.
-Н.Энхбаяр ар гэрийнхэнтэй хэдэн удаа уулзсан бэ?
-Гурван удаа уулзсан. Эхлээд прокурорын хяналтад тавдугаар сарын 5-нд уулзсан. Дараа нь АТГ-ын зөвшөөрлөөр уулзсан байгаа. Хамгийн сүүлд өчигдөр 18:00 цагт хүү Батшугар нь уулзсан.
-Албадан эмчилгээнд шилжүүлж байгаа гэж ойлгож болох уу?
-Эрүүл мэндийн сайдын тушаалаар томилогдсон хоёрдугаар эмнэлгийн нарийн мэргэжлийн эмч нарийн үзлэгийн дүгнэлтийг үндэслэн эмнэлэг рүү шилжүүлж байгаа. Түүнээс хүчээр эмчилгээнд оруулж байгаа хэрэг биш ээ.
-Өчигдөр орой түүний бие гэнэт муудаж ухаан алдаж унасан тухай мэдээлэл байна. Энэ хэр бодит мэдээлэл бол?
-Ухаан алдаж унасан тохиолдол байхгүй.