Хөгжимт драмын театраас өрх тусгаарласнаас хойш эдүгээ 50 жилийнхээ ойтой золгоод буй УДБЭТ-ын хамт олон ойдоо бэлтгээд завгүй. Энэ сарын 15-нд төрсөн өдрөө нижгэр тэмдэглэхээр зэхэж буй театрынхан анх Чайковскийн “Евгений Онегин” дууриар хөшгөө нээж байсан удаатай. Тиймээс энэхүү дуурийг ОХУ-аас найруулагч авчирч, тухайн үеийнх нь тавилтаар үзэгчдэд хүргэж сюрприз барих нь. Мөн “Спартак” балетыг 20 жилийн дараа сэргээн засварлаад төрсөн өдрөөрөө тайзнаа тавихад бэлэн болжээ. Ийнхүү үзэгчдээс хамгийн өндөр үнэлгээ авдаг Оросын томоохон хоёр бүтээлийг тавихаар болсондоо театрын уран бүтээлчид ч сэтгэл хангалуун байна билээ.