Украины нийслэл Киевийн Шевченко районы шүүх тус улсын Автономит бүгд найрамдах Крымын Дээд зөвлөлийн дарга Владимир Константинова, ерөнхий сайд Сергей Аксенов нарын саатуулах шийдвэр гаргасан талаар Украины ерөнхий прокурорын эх сурвалжийг үндэслэн ИТАР-ТАСС агентлаг мэдээллээ.

Тэднийг Украины Эрүүгийн хуулийн 109 дүгээр зүйлийн 1-д зааснаар “Төрийн эрхийг авахаар Үндсэн хуулийг зөрчиж, эх орноосоо урвасан, хүчирхийлэл үйлдсэн” гэж буруутгаж байгаа юм байна.

Хоёрдугаар сарын сүүлчээр Украинд төрийн эрх мэдэл сөрөг хүчний гарт шилжиж Дээд Радад сөрөг хүчин олонхи болж ерөнхийлөгч Виктор Янукович төрийн эрхээс зайлуулагдахад Крымын удирдлага шинэ төрд захирагдахаас татгалзсан юм.
Константиновагийн тэргүүлдэг Крымын парламент Автономит Бүгд найрамдах улсынхаа Засгийн газрыг огцруулж шинэ ерөнхий сайдаар “Оросын нэгдэл” хөдөлгөөний тэргүүн Сергей Аксеновыг томилсон юм. ХаринУкраины эрх баригчид Засгийн газрыг ингэж солихын эсрэг байлаа. Шевченкогийн районы шүүх ч Сергей Аксеновыг Крымын ерөнхий сайд биш гэж тогтоожээ.

Сергей Аксенов ерөнхий сайд болонгуутаа ОХУ-ын ерөнхийлөгч Путинд хандаж бүс нутагтаа энхтайван тогтоож өгөхийг хүссэн юм. Үүний дараа ОХУ-ын Холбооны зөвлөл Украинд оросын цэрэг оруулахыг зөвшөөрсөн юм. Харин одоо Оросын эрх баригчид Крымд оросын цэрэг оруулах зайлшгүй шаардлага одоохондоо алга гэж байгаа юм.