ОХУ-ын ерөнхийлөгч Владимир Путин Украинд бий болоод байгаа  нөхцөл байдлын талаар  гуравдугаар сарын 4-нд анх удаа хэвлэлийнхэнд мэдэгдэл хийлээ.


Украинд цэргийн эргэлт гарсан

Тэрээр энд цугларсан оросын томоохон хэвлэл мэдээллийн хэрэгслийн сурвалжлагчдын асуултыг аваад дараа нь хариулсан байна.
Владимир Путин юуны түрүүнд Киевт болсон үйл явдлыг цэргийн эргэлт гэж нэрлэжээ. Тэрээр Украинд Үндсэн хуулийн бус аргаар, зэвсэглэсэн этгээдүүд засгийн эрхийг авсан гэсэн байна. “Үүнтэй хэн ч маргахгүй. Хэн маргах юм. Би, миний хамтрагчид ч хариулж чадахгүй асуулт байна. Сүүлийн үед би олон хүнтэй утсаар ярьж байна. Асуулт бол яах гэж үүнийг хийсэн бэ гэдэг л байна” гэж тэр хэлжээ.

Янукович буулт хийсэн

Путин бас ерөнхийлөгч Янукович сөрөг хүчинтэй хэлэлцэж гарын үсэг зурж буулт хийсэн.  Тэр парламентын ээлжит бус сонгууль явуулахыг зөвшөөрсөн, цагдаагийн хүчнийг нийслэлээс гаргах тушаал өгсөн.
Харин түүнийг Харьковт ажлаар явах үед нь түүний албан өргөө, засгийн газрын байрыг эзлэн авсан. Яах гэж ингэсэн бэ. Тэр тэгэж өөрийнхөө эрхийг өгсөн. Түүнээс өөр арга зам ч байгаагүй. Улс орноо тийм этгээдүүдэд өгөх ямар хэрэг байв. Энэ бол бодлогогүй алхам байсан. Үр дүн нь санаанд оромгүй байдлаар гарлаа шүү дээ” гэж Путин хэлжээ.
ОХУ-ын ерөнхийлөгч Путин бас хэдийгээр эрх мэдлээ алдаад байгаа ч Украин  улсын цорын ганц, хууль ёсны ерөнхийлөгч бол Виктор Янукович гэсэн байна. “Түүнд ямар ч эрх мэдэл байхгүй нь тодорхой, гэхдээ би үүнийг дахиад давтан хэлье. Украины хууль ёсны ерөнхийлөгч нь зөвхөн Янукович” гэж Путин хэллээ.

Украинд ОХУ цэрэг оруулахгүй

Украинд болж байгаа үйл явдалтай холбогдуулан ОХУ Крым рүү цэрэг оруулахгүй гээд “Одоохондоо ийм шаардлага алга” гэсэн байна.
Баруун болон төвийн цэргийн тойргуудад хийж байгаа хээрийн сургууль энэ үйл явдалтай ямар ч хамаагүй, бүр эрт төлөвлөсөн ажил байсан гэлээ.
Харин цэрэг оруулна гэдэг бол ОХУ өөрийнхөө иргэдийг хамгаалах эцсийн арга гээд “Манай цэргийн албан хаагчид, украинчууд бэхлэлтийн нэг талд байна гэдэгт итгэж байна” гэжээ.
“Бид украины ард түмэнтэй байлдахыг хүсэхгүй байна” гэж Путин Газета.Ru-гийн асуултад хариулжээ. Үүний зэрэгцээ Орос улс Крымын өөрийгөө хамгалаах хүчний бэлтгэл ажилд оролцоогүй гэсэн байна.
Тэр “Украиныг бид зөвхөн ойрын хөрш төдийгүй, ахан дүү улс гэж үзэж байна. Манай зэвсэгт хүчнүүд зэвсэг нэгтэй нөхөд, тэдний олонхи нь бие биенээ таньдаг мэддэг найзууд. Оросын болоод украины цэргийн албан хаагчид бэхлэлтийн хоёр талд биш нэг талд байна гэдэг би итгэж байна. Энэ бол мэдээж Крымын тухай ярьж байна. Бурхан минь тэнд нэг ч буун дуу битгий гараасай” гэж мэдэгдлээ.
Украинчууд Януковичийг алчихаж мэдэх учраас Орос түүний хувь заяаны төлөө хүмүүнлэгийн үүднээс хандаж байна гэж тэр хэлсэн байна.

Украины ерөнхийлөгчийн сонгууль, Тимошенко

Тавдугаар сарын сүүлчээр Украинд болох ерөнхийлөгчийн сонгуулийг  Орос мэдээж хүчирхийллийн уур амьсгалд болно гэж үзэж байгаагаа Путин илэрхийллээ. Ийм учраас Юлия Тимошенког Орост ирэхийг нэг их хүсэхгүй байна гэлээ. “Мэдээж тэр яах гэж ирэх юм. Тэр чинь засгийн газрын тэргүүн биш шүү дээ” гэж Путин тэмдэглэлээ.
Путин бас Майданыхантай зөвшилцөхөд тэд засгийн газартаа шударга шаардлага тавих ёстой гэжээ. ОХУ-ын Ерөнхийлөгч Владимир Путин Украины өмнөх ерөнхийлөгч Кучма, Ющенко, ерөнхий сайд асан Тимошенко нартай хамтран ажиллах болно гэдгээ сануулжээ.

“Нэг этгээд л нэгийгээ сольж байгаа юм”

ОХУ-ын тэргүүн Украинд болж байгаа үйл явдлыг ингэж нэрлэж байна. Сүүлийн жилүүдэд украинд юу ч өөрчлөгдөж сайжраагүй, авлига байж боломгүй хэмжээгээр өсч ард түмэн тэвчих аргагүй болсон. “Гэхдээ хууль ёсны бус шилжилтийг зөвтгөж болохгүй. Зөвлөлтийн бүрэлдхүүнд байсан орнуудад шилжилт үндсэн хуулийн аргаар хийгдсэн. Майданы жагсагчдыг би өнөө болтол засгийн зөвхөн нүүр царайг л өөрчлөх гэж байгаа гэж бодож байна. Тэд юу шаардаж байна вэ. Тэд бүр нэг этгээдийг нөгөөгөөр солиод сурчихсан байна” гэж Путин хэлснийг “КП” иш татжээ.