ОХУ-ын Холбооны зөвлөл Украины улс төр нийгмийн нөхцөл байдыг тогтворжуулахын тулд Оросын зэвсэгт хүчнийг  тус улсад оруулах гэсэн Ерөнхийлөгч Владимир Путины  хүсэлтийг санал нэгтэй хүлээн авсан байна.
Үүний гол шалтгаанаа энэ баримт бичигт Украинд нөхцөл байдал төвөгтэй болж ОХУ-ын иргэд болоод, украины нутагт алба хааж байгаа оросын цэргийн бааз дахь албан хаагчдын амь насанд аюул учирч байгаа нөхцөл байдал хэмээн тайлбарлажээ.
Гуравдугаар сарын 1-ний оройн 19,30 цагт сенат ээлжит бус хуралдаан хийж Ерөнхийлөгчийн санаачилгыг дэмжсэн байна. Сенатын хуралдаан үүгээр өндөрлөсөнгүй. Хуралдаанд Холбооны зөвлөлийн орлогч Юрий Воробьев АНУ-ын ерөнхийлөгч Барак Обамагийн “Орос үүнийгээ өндөр үнээр төлөх болно”, “Оросын ард түмний шууд өдөөн хатгалга”, “Шууд заналхийлэл” гэсэн мэдэгдлийг танилцуулсан байна. “АНУ-ын ерөнхийлөгч Барак Обама улаан шугаман дээр гарч ирлээ” гэжээ.
ОХУ-ын Холбооны зөвлөлийн шийдвэрийг Европын орнуудын гадаад хэргийн сайд нар нухацтай авч үзэж байна. Британийн гадаад хэргийн сайд Уильям Хейг Оросын үйл ажиллагааг Украины тусгаар тогтнол, газар нутгийн бүрэн бүтэн байдалд учирч байгаа “бодитой аймшигт аюул” гэжээ. Шведийн гадаад хэргийн сайд твиттертээ “Оросын цэргийн довтолгоо нь олон улсын эрхзүйг зөрчиж  европын аюулгүй байдалд аюул учруулж байна” гэж бичжээ.
Оросын цэрэг Украинд орох гэж байгаатай холбогдуулан НҮБ-ын Аюулгүйн зөвлөл орой болсон хойно шуурхай зөвлөгөөн хийсэн байна.