Украинд Ерөнхийлөгчийн ээлжит бус сонгуулийн кампанит ажил албан ёсоор эхэллээ. Дээд Радагийн “Ерөнхийлөгчийг Үндсэн хулуийн бүрэн эрхээсээ өөрөө татгалзсанд тооцох тухай” тогтоол баталснаар төрийн тэргүүний ээлжит бус сонгуулийг тавдугаар сарын 25-нд явуулахаар тогтсон юм.
Ерөнхийлөгчийн соногуульд нэр дэвшигчдийг санал хураах өдрөөс 55 хоногийн өмнө буюу гуравдугаар сарын 30 хүртэл бүртгэх юм. Нэр дэвшигчдээс Сонгуулийн төв хороонд барьцаа болгон 2,5 сая гривен буюу 280 орчим мянган доллар хураах юм байна.
Өнөөгийн Украины эдийн засгийн байдлаас шалтгаалан хөрөнгө хэмнэх үүднээс орон нутгийн сонгуулийн комиссын гишүүдийн тоо, сонгуулийн дүнг гаргах хугацааг танаж байгаа гэнэ.
Сонгуульд хэн хэн нэр дэвших бол гэсэн сэтгүүлчдийн асуултад “Бахткивщина” намын тэргүүн Юлия Тимощенко, УДАР намны тэргүүн Виталий Кличко нарыг нэр дэвших магадлалтай гэж Сонгуулийн төв хорооны тэргүүн Михаил Охендовский хариулаад өөр хүн нэр дэвшихийг үгүйсгээгүй байна.