Украины ерөнхийлөгч асан Виктор Януковичийг эрэн сурвалжилж эхэллээ гэж тус улсын ДЯЯ мэдээллээ. Энэ талаар Украины ДЯЯ-ны сайдын үүрэг гүйцэтгэгч Арсен Аваков өөрийнхөө Facebook-т бичсэнийг “Комментарий” иш болгон мэдээлжээ. “Энгийн номхон ард иргэдийг бөөнөөр нь хядсан хэрэгт нь эрүү үүсгэн ерөнхийлөгч асан Янукович болон бусад албаны хүмүүсийг өнөөдөр өглөөнөөс эхлэн эрэн сурвалжилж эхэллээ” гэж энд дурдсан байна. Украины парламент Дээд Рада энэ сарын 22-ны өдөр ерөнхийлөгч Виктор Януковичийг огцруулж  ерөнхийлөгчийн ээлжит бус сонгуулийг тавдугаар сарын 25-нд явуулахаар шийдвэрлэсэн юм. Энэ өдөр нь Янукович донецкийн нисэх буудлаас гадаад руу нисэхээр завдсан ч түүнийг хил давуулаагүй юм.