УИХ, НИТХ-ын сонгуулийн саналын хуудсыг автомат машинаар тоолохоор болсон. Энэ бол мэдээж дэвшил.  Гэхдээ иргэн нэг бүрийн санал үнэн зөв тоологдох эсэхэд эргэлзэх гишүүн тун чиг олон бий. Тэдний нэг нь Д.Очирбат гишүүн. Тэрээр “Манай улсын худалдан авсан санал тоолох машиныг АНУ-д ашиглаж байжээ. Гэвч энэ машины “буянаар” нэг мужийн сонгуулийн дүн будлиантсан аж. Бүр 5500 саналын хуудсыг буруу тоолсон удаатай гэнэ.  Ийм машинд найдах арга алга” гэдгээ хэлж байлаа. Хаширсан хүн гэж хаширсан хүнийг л хэлнэ гэгчээр Д.Энхбат гишүүн автомат машинаар санал тоолохын зэрэгцээ гараар давхар тоолох санал ч хэлж байлаа. Гэвч СЕХ-ны дарга Н.Лувсанжав “Хуульд саналын хуудсыг гараар тоолох заалт ороогүй. Тиймээс боломжгүй” гэлээ.