Британийн шилдэг кино шалгаруулах БАФТА-гаас “Таталцлын хүч”, “12 жил боолчлолд” кино гол шагналуудыг нь түүлээ. Жүжигчин Сандра Баллокын гол дүрд нь тоглосон “Таталцлын хүч” кино визуал эффект, зураг авалт, дууны найруулга, хөгжмийн номинацад шагнал хүртсэний дээр шилдэг найруулагчийн шагналыг нь авчээ. Тус киног Альфонсо Куарон найруулсан юм.
Тэгвэл БАФТА-гийн шилдэг киногоор “12 жил боолчлолд” кино тодорч, тус киноны гол дүрийн жүжигчин Чиветел Эжиофор шилдэг эрэгтэй дүрийн шагнал хүртсэн байна. Харин эмэгтэй гол дүрийн шагналыг “Цэнхэр мэлрэг” киноны дүрээрээ Кейт Бланшет авчээ. 
Харин туслах дүрийн тухайд эрэгтэйн төрөлд “Ахмад Филлипс” киноны Бархад Адби, эмэгтэйн төрөлд “Америк луйвар” киноны Женнифер Лоренс нар тэргүүлжээ. Өнгөрсөн онд дэлгэцнээ гарсан кинонуудаас үзэгчдийн таашаалд ихээхэн нийцсэн “Агуу Гэтсби” кино дизайны хоёр ч номинацыг өөрийн болгожээ. Хүүхэлдэйн кинонуудаас “Frozen” тэргүүлж, шилдэг хүүхэлдэйн киногоор нэрлэгдсэн байна.
