Копенгагены амьтны хүрээлэн тоо толгой нь илүүдээд байсан анаашнаасаа эв эрүүл, залуухан нэг анаашийг нь устгаж, арслангуудынхаа хоол болгожээ. Тус амьтны хүрээлэнд төрсөн Мариус нэртэй хоёр настай залуу анаашийг тэд генийн хувьд бусадтайгаа хэтэрхий ижилхэн буюу бусдаасаа ялгараад байх давуу талгүй ердийн нэг анааш гэж үзсэн учраас цаашид амьтны хүрээлэнд зай эзлүүлэн, зардал гарган тэжээгээд байх шаардлагагүй гээд олны өмнө тариа хийж, амийг нь тасласан байна. Уг нь, Мариус анаашийн тухай мэдээлэл хэдэн сарын өмнө олон нийтэд хүрч, түүнийг аврах гэсэн олон мянган хүн гарын үсгээ зурж, амьтны хүрээлэнгийн удирдлагыг шийдвэрээ өөрчлөхийг шаардаж байжээ. Тэр ч бүү хэл Мариусыг цаашид тэжээх аргагүй гэж байгаа бол өөр амьтны хүрээлэнд шилжүүлье, бүр хувьдаа худалдаж авъя хэмээн 500 мянган еврогийн санал тавьсан хүн ч гарчээ.

 Гэвч Копенгагены амьтны хүрээлэн дүрэм журмаараа түрий барьж, эзэмшлийн амьтнаа өөр хүрээлэнд шилжүүлэхгүй, гэхдээ өөрсдөд нь нэгэнт байлгах шаардлагагүй учраас өөрсдийн журмын дагуу устгана гэж зүтгэсээр Мариусын амийг хороожээ. Мариуст тариа тарих үед олон арван хүүхэд, эцэг эхчүүдийнхээ хамт ирж харсан бөгөөд тарьсны дараа анаашийг буудаж, хэсэг хэсгээр нь хуваагаад амьтны хүрээлэнгийн  арслангуудад өдрийн хоол болгож өгсөн байна.
Энэ явдлынхаа төлөө Копенгагены амьтны хүрээлэн асар их шүүмжлэл хүлээж байгаа ч жилдээ 20-30 амьтан, тэр дундаа баавгай, бар, тахь гэх мэт амьтдыг хүртэл устгадаг тус хүрээлэн өөрсдийн үйлдлийг хамгаалсаар байна.