УИХ-ын сонгуулийн санал хураалт явуулах өдрийг энэ долоо хоногт товлох учиртай. Тов тогтоох юм бол улс төрийн намууд тус тусын хуралдаанаа хийж, сонгуульд оролцох эсэх шийдвэрээ гаргах юм. Намуудын хурлын зар ч эхнээсээ гарч байна. МАН-ын Бага хурал тавдугаар сарын 1-нд буюу ирэх мягмар гаригт Тусгаар тогтнолын ордонд болох аж. Харин АН-ын ҮЗХ-ны ээлжит хуралдаан МАН-ын Бага хурлын маргааш нь Төрийн ордны Их танхимд болох тов гарчээ. Намууд энэ хурлаараа 2012 оны сонгуулийн мөрийн хөтөлбөрөө хэлэлцүүлж, ямар тактик баримталж сонгуульд оролцохоо гаргах юм.  Мөн энэ удаад аль тойрогт хэнийгээ сойх эсэх асуудлаа шийдэх халуухан хурлууд болох нь мэдээж.