Ашигт малтмалын газраас “Саусгоби сэндс” компанийн тусгай зөвшөөрлийг түдгэлзүүлсэн. Ингэснээр уг компани “Овооттолгой”-н ордоос олборлосон нүүрсээ экспортлохгүй гэсэн үг. Үүнд хэрхэн хяналт тавьж ажиллаж байгааг АМГ-ын даргын үүргийг түр орлон гүйцэтгэгч М.Ариунбаяраас тодрууллаа.
-“Саусгоби сэндс” компанийн лицензийг түдгэлзүүлсэн. Гэтэл тус компани албан ёсны мэдэгдэл ирээгүй учраас үйл ажиллагаагаа явуулж байна гэх юм?
-“Өмнийн говийн элс” компани үйлдвэрлэлийнхээ суурь бэлтгэлээ хангаж байгаа. Олборлолтынхоо бэлтгэл ажлыг хийж буй. Бас баяжуулах үйлдвэрээ ч барьж байгаа байх.
-Нүүрс олборлох ажлаа зогсоосон болов уу. Зогсоосон эсэхэд хэн хяналт тавих ёстой вэ?
-Уулын ажлын бэлтгэл, хөрс хуулалтын үед олборлолт хийгддэг. Өөрөөр хэлбэл, хөрс хуулж байхад нүүрс гарч ирэхээр нь авна гэсэн үг. Олборлосон нүүрсээ экспортолж байгаа эсэхэд манайх хяналт тавьдаггүй учраас сайн мэдэхгүй байна. Үүнд Мэргэжлийн хяналт, Гаалийн байгууллага хяналт тавина.
-Газрын ховор элементийн шинэ орд нээгдсэн гэсэн. Энэ ордын талаар мэдээлэл өгөөч?
-Газрын ховор элементийн орд биш. Ховор металлын орд Дундговь аймагт нээгдсэн. Үнэхээр төгс, нандин, гоё орд. Тэнд байгаа эрдэс нь хүртэл шинэ. Үүнийг Монгол Улс өөрийн нэрээр нэрлэх ёстой гэсэн байр суурьтай байгаа. Стратегийн ордод орох нь тодорхой. Энэ ордын урьдчилсан хайгуул судалгааг хувийн хөрөнгөөр хийгээд дуусч байна. Дараагийн шатны судалгаа шинжилгээ хийх ёстой.
-Нөөц нь тогтоогдсон уу. Хэдий хэрийн нөөцтэй вэ?
-Тогтоогдсон. Дахин хэлэхэд, эрдэс, гарал үүсэл нь ч шинэ сонирхолтой орд.
