Их Британи улсын  Цагаачлалын сайд Марк Харпер гэрийн үйлчлэгч нь тус улсад ажиллаж амьдрах ямар ч бичиг баримтгүй байсан нь илэрсний дараа огцорсон байна.
Энэ тухайд сайд өөрөө гэрийн үйлчлэгч нь  хуурамч бичиг баримт ашиглан хөдөлмөрийн байгууллагад бүртгүүлэн өөрийг нь  мэхэлсэн гэж хэлээд энэ бүхнийг нягтлаагүй алдааныхаа төлөө огцорч байгаагаа албан ёсоор мэдэгджээ. Энэ үеэрээ тэр цагаачлалын тухай хууль эрхзүйг харьцангуй хатуу болгох шаардлагатай байгаа гэдгийг бас хэлсэн байна. Ер нь Британид хууль бусаар цагаачлагчдын эсрэг хуулийг чангатгах тухай яригдаж эхлээд байгаа юм.
Харпер өөрөө Цагаачлалын сайд байх хугацаандаа цагаач иргэдийн бичиг баримтыг зөвхөн ажил олгогч төдийгүй эмнэлгийн ажилтнууд, нийгмийн хамгааллынхан шалгаж байх ёстой гэсэн хууль санаачлан батлуулж байсан юм.