“Японы Бетховен” нэрээрээ алдаршсан  хөгжмийн зохиолч Маморү Самүрагочи хүний зохиосон хөгжмийг өөрийнх хэмээн олон жилийн турш сонсогч олныг хуурч явснаа хүлээжээ. Дүлий атлаа хөгжмийн бүтээл туурвидаг гэдгээрээ суут Бетховентой харьцуулагдах болсон тэрээр 1990-ээд оноос Хирошимагийн симфони 1 хэмээх бүтээлээрээ нэрд гарсан юм. Гэвч одоо 50 настай хөгжмийн зохиолч үнэн хэрэгтээ 1996 оноос хойш хөгжим бичихээ больсон, өнгөрсөн хугацаанд өөр хүнд хөлсийг нь төлж хөгжим зохиолгоод өөрийн нэрээр гаргадаг байснаа хүлээн зөвшөөрсөн байна. Гэхдээ түүний өмнөөс хөгжмийг нь бичдэг зохиолч нууц хэвээр байгаа аж.
М.Самүрагочиг дөрвөн настайдаа төгөлдөр хуур тоглож сурч, арван настайдаа Бетховен, Бахын бүтээлүүдийг тоглодог байсан гэдэг. Тэрээр 35 настайдаа бүрэн сонсголгүй болсон ч хөгжмөө үргэлжлүүлэн бичсээр байгаа гэж ярьдаг байсан юм. Атомын бөмбөгдөлтөд өртөж амь насаа алдсан хүмүүсийн гэгээн дурсгалд зориулсан түүний Хирошима симфони 2003 онд ихээхэн хит болж, 100 мянган хувь зарагдаж байжээ.