Солонгосын үндэсний хоолны салшгүй нэг хэсэг болсон кимчи өдгөө дэлхий даяар тархаж,  Европ, АНУ-ын зоогийн газрын цэсэнд хүртэл орж ирээд байна. McDonald’s сүлжээний зарим салбар кимчитэй бургер санал болгож, АНУ-ын тэргүүн хатагтай кимчи дарах өөрийн жорыг нийтэд танилцуулах болсон нь сүүлийн хэдэн жил Өмнөд Солонгосын төр үндэсний хоолоо, тэр дундаа кимчигээ дэлхий даяар экспортлох бодлогыг хэр үр дүнтэй хэрэгжүүлж чадсаныг илтгэнэ. БНСУ-ын Засгийн газраас үндэсний хоол хүнс тэр дундаа кимчиг судалж, хөгжүүлэх ажилд саяхан гэхэд есөн сая ам.долларын хөрөнгө оруулаад байна. Мөн өөрсдөөс нь урьтаж их хэмжээгээр үйлдвэрлэн олон улсад экспортлох болсон Хятадаас өрсөж, дахин давтагдашгүй, жинхэнэ солонгос кимчи дарахын тулд үйлдвэрлэлийн технологи сайжруулахаар 34 сая ам.доллар заржээ.

 Солонгосчууд үндэсний хоолоо сурталчлах өдөрлөг, арга хэмжээг янз бүрийн улс оронд зохион байгуулж, олон улсад цацагддаг Ариранг зэрэг телевизээрээ солонгос хоолны гайхамшгийг магтан дуулсан нэвтрүүлгүүд маш ихээр гаргадаг билээ. Энэ бүхний дүнд өнөөдөр кимчиг зөвхөн солонгосчууд биш дэлхий даяараа мэддэг болоод байна. Харин энэ хөрсөн дээр одоо зөвхөн Солонгост үйлдвэрлэсэн кимчиг л дэлхий нийтэд экспортолж, Хятадын үйлдвэрлэгчдийг шахаж гаргахыг тэд эрмэлзэж байгаа аж. Үүний тулд барууныханд таалагдахын тулд хэт халуун ногоотой биш, бас идсэний дараа амнаас эвгүй үнэр гарахгүй байхыг бодолцон янз бүрийн туршилт хийж, шинэ жор гаргаж байгаа гэнэ.
Хэт халуун ногоотой, бас таагүй үнэртэй болохоор нь Солонгосын сүүлийн үеийн хүүхэд багачууд хүртэл дээр үеийнх шиг хурц амттайг нь идэж чадахаа больсон ч элдэв төрлийн халдварын эсрэг хүчтэй тэмцдэг, эрүүл мэндэд хэрэгтэй хүнс гэдгээр нь солонгосоор зогсохгүй хилийн чанадад ч өргөнөөр хэрэглэж байна.