Америкийн Үндэсний аюулгүй байдлын агентлаг, Британийн Засгийн газрын харилцаа холбооны удирдах газар гэгч электрон тагнуул явуулдаг хоёр том байгууллагаас компьютер, таблет, ухаалаг гар утасны янз бүрийн программ хангамжаар дамжуулан мэдээллийг нууцаар цуглуулдаг тусгай арга боловсруулсан байна. Энэ тухай “The New York Times”, “The Guardian” сонины сэтгүүлчид экс тагнуул Сноудений мэдээг иш татан өгүүлжээ. Энэ хоёр сонины мэдээлснээр Америк ба Британийн тагнуулын албад ухаалаг гар утасны хэрэглэгчдийн талаарх нууцаар мэдээлэл цуглуулахын тулд 2007 оноос эхлэн хамтран ажиллаж байгаа гэнэ. Энэ хамтын ажиллагааны хүрээнд “Facebook”, “Flickr”, “LinkedIn”, “Twitter” гэх зэрэг олон нийтийн сүлжээг ашиглаад зогсохгүй “Andry Birds” гэх мэт олонд алдартай тоглоомыг ашигладаг юм байна.

Энэ хоёр орны тусгай албад нь жишээлэхэд “Andry Birds” тоглоомоор дамжуулан хэрэглэгчийн ярьсан утас, хүйс, улс төрийн үзэл бодол, зурвас зэргийг бүртгэн уншиж “Google Maps” ашиглан хаана явж байгаа тухай мэдээг тогтмол авч байдаг аж.

Энэ мэдэгдлийн талаар тайлбар хүсэхэд Цагаан ордны албан ёсны төлөөлөгч Жей Карни нь “Америкийн тагнуулын албад зөвхөн аюулгүй байдалд заналхийлсэн хүмүүсийг тагнадаг” гэсэн бол Үндэсний аюулгүй байдлын агентлаг нь “Олон нийтийн сүлжээ, ухаалаг гар утсаар дамжуулан нууц мэдээлэл цуглуулах хөтөлбөрөөр жирийн америкчуудыг тагнадаггүй. Тагнуул ба сөрөг тагнуулын ажилд шаардлагатай, хуулийн зөвшөөрөгдсөн мэдээллийг л цуглуулдаг” гэжээ.