Билгийн тооллын XYII Жарын “Ялгуулсан” хэмээх модон морь жилийн сар шинийн хүчит бөхийн барилдааны хуваарь гарчээ. Модон морин жилийн Цагаан сард зориулсан “Бөхийн баяр” цуврал барилдаан энэ сарын 25-нд сумын цолтой залуу 512 бөхийн барилдаанаар эхлэх ажээ. Харин энэ сарын 26-нд аймаг, цэргийн цолтой 256 бөхийн барилдаан болох юм. Энэхүү барилдааныг Монголын Үндэсний бөхийн холбоо, Зүүнхүрээ Дашчойлон хийдтэй хамтран зохион байгуулдаг уламжлалтай. Өсвөрийн бөхчүүдийн барилдааны хувьд энэ сарын 28-нд болох гэнэ. Барилдаанд 1997 оны нэгдүгээр сараас хойш төрсөн хүүхдүүд оролцох бөгөөд бүртгүүлэхдээ иргэний үнэмлэх, төрсний гэрчилгээ, эрүүл мэндийн дэвтэр, “Хүний хөгжил сан”-гийн дэвтэртэйгээ ирэхийг Монголын Үндэсний бөхийн холбооноос санууллаа. Битүүний өдрийн барилдаанд  улс, аймгийн алдар цолтой 256 бөх барилдсанаар өндөрлөх юм байна.