МУИС-иас эхэлсэн бүтцийн шинэчлэлийг ШУТИС хийхээр зэхэж буй. Их сургуулиудын нүсэр бүтцийг багасгах, олон дарга нарыг цөөлөх энэ шинэчлэлээс МУБИС ч хоцрохгүй нь. Энэ талаар МУБИС-ийн Сургалт, хамтын ажиллагаа эрхэлсэн дэд захирал Д.Мөнхжаргал “Саяхан манай багш нар 17-18 насны хүүхдийн төлөвшлийн талаар судалгаа хийхэд бүтээлч сэтгэлгээтэй бүлгээс хамааралтай, бусдыг аялдан дагалддаг зэрэг сэтгэхүйн онцлог илрэх хандлагатай байна гэсэн судалгаа гарсан. Бүтээлч бус байдал нь яваандаа юмыг аргацаадаг, хуурдаг, аливааг чанартай хийж гүйцэтгэдэггүй байдал руу хөтөлдөг.  Ийм иргэдтэй болчихвол нийгэм маань яаж хөгжих вэ. Тиймээс багш бэлтгэх тогтолцоо маань өөрөө чанаргүйдлийн тойргийн бараг эх нь юм биш үү гэдэг дүгнэлт гарсан. МУБИС-ийн шинэчлэлийн асуудлыг МУБИС гэдэг тэр байшин дотор болж буй үйл явц биш, улс орны хэмжээнд томоохон нөлөө үзүүлдэг хүчин зүйлийг өөрчилнө гэсэн өнцгөөс харж байгаа. МУИС, ШУТИС-тай адилхан дээд боловсролын тогтолцоо нь гацсан, гажсан үзэгдлүүд манай сургуульд ч оршиж байгаа. Тийм учраас 20 хүний бүрэлдэхүүнтэй боловсролын шинэчлэлийн ажлын хэсэг ажиллаж байна” гэв.
Дэлхий нийтэд багш бэлтгэх үндэсний их сургуулиуд ямар бүтэц, зохион байгуулалттай байдаг, ямар чиг хандлагаар багш бэлтгэдэг вэ гэдгийг нэлээд судалж, удахгүй хийх шинэчлэлдээ тусгахаар зэхжээ.