Усанд унасан утсыг бид гэрийн нөхцөлд эсвэл засварын газарт гээд аль болох аргалж засаад ашиглахыг боддог. Утсаа салгаад сайтар хатаасны дараа асаах нь одоогийн байдлаар хамгийн найдвартай аргаар шалгараад буй. Гэвч бид усыг хатаасан ч зарим тохиолдолд усны үүсгэсэн зэвийг арилгаж чаддаггүй. Тийм ч учраас заримдаа утсыг хатаасны дараа зүгээр ажиллаж байгаад яваандаа доголдол илэрч, ажиллахаа больдог. Энэ нь усны минерал нь эд ангид наалдаж гэмтээх, зэв үүсгэснээс болдог аж. Энэ нь утас эвдрэх хамгийн гол шалтгаан болдог бөгөөд яг энэ асуудлыг шийдэх бяцхан засварын хэрэгслийг Оливер Мюрфи хэмээх 20 настай залуу зохион бүтээжээ. “Reviveaphone” хэмээн нэрлэсэн энэ зүйл нь утсанд тогтсон ус, зэв, элдэв минералыг татаж авах уут болон түүний дараа дэлгэж тавих хавтангаас бүрддэг аж. Энэ уутанд утсаа хийгээд 24 цаг болоход ус, зэвийг татаж, дахин асаахад ямар ч асуудалгүй болгодог гэнэ. Үүнийг зөвхөн гар утас гэлтгүй MP3 тоглуулагч, мини таблет, зургийн аппарат, камер зэргийг усанд унагасан үедээ ч ашиглаж болох ажээ. Оливер хүүхэд байхаасаа эвдэрсэн утас авч засан интернэтээр худалддаг байсан учир усанд унагасан утсыг засах аргыг туршлагынхаа явцад олж мэдээд, “Reviveaphone”-ийг бүтээсэн бөгөөд хөрөнгө оруулагч олж, олноор нь үйлдвэрлэн одоо Amazon, Ebay-гээр худалдаж байгаа аж.
