Шинэ оноо угтахад 15 хоног үлдэж байна. Амжилт бүтээл, аз хийморь, баяр жаргал дуудсан шинэ оноо нийслэлчүүд хэрхэн угтан авах талаар нийслэлийн Засаг даргын хэрэгжүүлэгч агентлаг Соёл урлагийн газрын дарга Б.Батцэнгэлээс тодрууллаа.
-Шинэ оноо угтахад хэдхэн хоног үлдлээ. Энэ шинэ жил онцгой болох байх гэсэн хүлээлт хэн бүхэнд байна?
-Шинэ жилийг тэмдэглэх нийслэлийн ажлын хэсэг энэ сарын 31 буюу он солигдох мөчийг тун онцгой байдлаар угтахаар бэлтгэл ажлаа хангаж байна. “Мөнгөн шөнө”  арга хэмжээ албан ёсоор 20:00 цагт эхлэх бөгөөд рок попын дуучид түлхүү оролцоно. Энэ үеэр тэсрэлт хийсэн урлагийн үзүүлбэрийн үеэр салют буудаж, нийслэлчүүд сүр жавхлантайгаар шинэ оноо угтах болно.
-Рок попын дуучид гэхээр бүгдээрээ оролцоно гэсэн үг үү?
-Бүх уран бүтээлчид гэж ойлгож болохгүй л дээ. Залуу, сүүлийн үед төрж байгаа уран бүтээлчид гэвэл илүү зохимжтой байх. Шинэхэн уран бүтээлчид маань нийслэлчүүддээ уран бүтээлээ толилуулж, хамтдаа шинэ он гаргана.
-Гэнэтийн бэлэг юу байгаа бол?
-Нийслэлчүүд хамтдаа шинэ оноо угтан дуулж, бүжиглэх нь гэнэтийн бэлэг биш гэж үү. Ямар ч гэсэн ирсэн хүмүүс уйдамгүй сайхан арга хэмжээ зохион байгуулахын тулд бид ажиллаж байна.
Чингисийн талбайдаа шинэ оноо гаргах гэж ирсэн хүмүүсээ ая тухтай байлгахын тулд халуун хоол ундны үйлчилгээ байхаас гадна иргэдийг дулаацуулах дулаахан цэг байрлуулахаар болсон.