Ням гарагийн оройн 18:00 цагт Их эзэн Чингис хааны талбай дахь  нийслэлийн төв сүлд модны гэрлийг асаалаа.  НИТХ-ын дарга Д.Баттулга, Хүүхдийн ордны авьяаслаг багачууд, нийслэлийн иргэдийн төлөөллийг байлцуулан   төв талбайд сүндэрлэсэн сүлд модныхоо гэрлийг асаасан байна.    Сүлд модны гэрэл асаах ёслол дээр НИТХ-ын дарга Д.Баттулга “Халаагаа өгөх гэж буй 2013 онд  Улаанбаатар хотод олон бүтээн байгуулалт өрнөсөн жил байлаа. Шинэ он, шинэ жилийг хүн бүхэн сайн сайхнаар төсөөлж, гэр бүлийнхэнтэйгээ, найз нөхөдтэйгээ, хамт олонтойгоо хамтдаа угтдаг. Өнөөдөр нийслэлийн иргэд та бүхэнтэйгээ хамт шинэ жилийн хамгийн гол чимэг болсон сүлд модны гэрлийг асаах гэж байгаадаа баяртай байна. Та бүхэндээ хамгийн сайн сайхан бүхний хүсэн ерөөе” гэж хэлсэн байна.