Францын Шамбери дахь хөгшчүүлийн асрамжийн газрын нэгэн сувилагчийг зургаан ч өндөр настны аминд хүрсэн хэргээр баривчлаад байна. Сүүлийн хоёр сарын хугацаанд энд настнууд сэжигтэйгээр гэнэт нас бараад байсныг шалгаж үзэхэд өнгөрсөн оны зун ажилд шинээр орсон нэг сувилагч нь зүв зүгээр байсан настнуудыг нөгөө ертөнцөд илгээсэн нь тодорхой болжээ. Тэрээр маш хүчтэй эмээр хөгшчүүлд коктейль бэлтгэж өгдөг байснаа өөрөө хүлээж, үүнийгээ өндөр настай, ядарсан хүнд тусалсан гэж мэдүүлж байгаа гэнэ.
“Тэр насан өндөр болсон хүмүүст хүмүүнлэг сэтгэлээр тусалж амар амгаланд илгээсэн гэж мэдүүллээ” хэмээн прокурорын газрын төлөөлөгч мэдээлжээ. “Хохирогчдын дундаж нас 80 байсан. Тэдний зарим нь ямар нэгэн өвчтэй байсан ч тэднийг алж болохгүй шүү дээ” гэж Шамберийн прокурорын орлогч Диетлинд Бодуэн тэмдэглэсэн байна.