Замын түгжрэлд автахгүй тэнгэрээр машин жолоодох үе хаяанд иржээ. “Pal-V One” хэмээх нисдэг машиныг 18 сарын дараагаас эхлэн худалдаанд гаргах гэж байна. Техникийн хувьд яг ч машин гэж хэлж болохгүй, гурван дугуйтай мотоцикль маягийн эд боловч зохион бүтээгчид нь үүнийг нисдэг машин гэж нэрлэж байгаа юм. Гэхдээ нисдэг машинтай болохын тулд багагүй бэл бэнчинтэй байх хэрэгтэй. Уг машиныг 295 999 ам.доллараар худалдах юм байна. Голландад хийж буй энэ машин агаарт, зам дээр ялгаагүй цагт 112 миль хурдлах чадвартай, найман секундын дотор 60 миль хүртэл хурдаа авдаг байна. Хоёр хүний суудалтай, дөрвөн цилиндртэй, нисэх болон зам дээр явах төлвөө 10 минутын дотор сольж болдог аж. 
Уг машин 4000 фит буюу 1200 метрээс доош өндөрт нисэх ёстой бөгөөд хөөрөхийн тулд 164 метр урттай зам буюу хөөрөх зурвас туулах шаардлагатай. Харин газардахад ердөө л 30 метр зай байхад л хангалттай гэнэ. Машины шатахууны сав 100 литрийн багтаамжтай ба үүгээр агаарт 354 километр, газарт бол 1200 км газар туулна.
Хуванцар, титан, хөнгөн цагаан ашиглан хийсэн машин ердөө 680 кг орчим жинтэй аж. Энэ машиныг унахын тулд спорт нисгэгчийн сертификат авах шаардлагатай юм байна. 
