Монголын загварын ертөнцийн хамгийн нэр хүндтэй наадам болох “Гоёл-2014″ наадмын шилдгийн шилдгүүд буюу шилдэг “ЗАГВАР ЗОХИОН БҮТЭЭГЧ”, “ЗАГВАР ӨМСӨГЧ”, “ТОП МОДЕЛЬ” гэсэн үндсэн гурван төрлийн  ялагчид өнөөдөр  тодорно. Үүнтэй холбогдуулан энэ жилийн топ модельд нэр дэвшигчдийн хамгийн өндөр ритенгитэй яваа “Гоёл-2010″ наадмын “Шилдэг загвар өмсөгч”, “Andra Model Management” агентлагийг захирал, мисс Х.Бадамгэрэлтэй өчигдөр болсон “UBS MUSIC VIDEO AWARDS-2013” наадмын шагнал гардуулах ёслолын ажиллагааны үеэр уулзаж цөөн хором ярилцсанаа хүргэж байна.

    Юуны өмнө танд Монголын роп попын уран бүтээлчдийн шилдэг бүтээлүүдийг шалгаруулах ёслолын ажиллагаа тохиож буй энэ сайхан үдшийн мэндийг хүргье.
     
    Баярлалаа. Танай сайтын хамт олонд болоод нийт уншигчдад нь олон арван уран бүтээлчид хуран цугласан, энэ гайхалтай үдшийн мэндийг хүргэж байна.
     
    Маргааш “Монголын дизайнеруудын холбоо”, “Шилмэл загвар” компаниас жил бүр уламжлал болгон зохион байгуулдаг “Гоёл-2014″ наадмын шилдгийн шилдгүүд тодорно. Энэ наадмын талаархи таны сэтгэгдэл.
     
    Миний хувьд 14 настайгаасаа загвар өмсөж эхэлсэн. 2006 оноос хойш тасралтгүй Гоёл наадамдаа амжилттай оролцож байгаа. Энэхүү наадам нь монголын загварын ертөнцийн хамгийн нэр хүндтэй, томоохон наадам болохоор жил бүр өндөр ач холбогдол өгч, эртнээс бэлтгэж оролцдог. Тиймдээ ч миний хичээл зүтгэл үнэлэгдэж 2010 оны Гоёл наадмын “Шилдэг загвар өмсөгч”-өөр шалгарч байлаа. Одоо бол “Andra Model Management” агентлагаа байгуулаад ирээдүйн Топ модель болох олон гайхалтай моделиудыг бэлтгээд явж байна.
     
    Таны хувьд “ТОП МОДЕЛЬ”-ийн болзлыг бүрэн хангасан нэгэн, одоо авах цаг нь болсон хэмээн загварын ертөнцийнхөн төдийгүй олон нийт ярилцаж байна. Энэ талаархи таны сэтгэгдэл.
     
    “ТОП МОДЕЛЬ”-ийн болзлыг ханган гэдэг нь хүссэн бүхний чадах зүйл биш юм шиг санагддаг. Миний хувьд тэр өндөр шаардлагад нийцэх гэж олон жилийн турш хөдөлмөрлөж ирсэн. Миний бодлоор “ТОП МОДЕЛЬ”-оор шалгарч буй хүн нь монголын загварын ертөнцийн хөгжлийн төлөө “Өмнө нь хийж бүтээсэн түүхтэй, Ирээдүйд ихийг хийж бүтээх чадвартай байхын зэрэгцээ, яг одоо ажиллаж амьдарч буй энэ цаг үедээ хийж бүтээж, гайхуулж яваа тийм л хүн байх ёстой гэж бодож явдаг юм.
     
    Та “Гоёл наадам”-д олон тасралтгүй оролцож байгаа хүний хувьд, шүүлтэнд хэр сэтгэл ханамжтай байдаг вэ.
     
    Жил бүрийн “Гоёл наадам”-ын шилдгүүдийг тодруулах шүүлтийг нэг хэсэг нь шударга үнэн болсон талаар ярилцаж байхад, нөгөө нэг хэсэг нь ганц хоёр хүний шийдвэрээр тодорлоо гэж ярьцгаадаг. Миний хувьд энэ наадамд олон жил оролцож байгаа хүний хувьд хэлхэд шүүлтийн дүн яг тайз нь дээр л гардаг. Оролцог бүр л шилдгүүд тодрох тэр мөчид хэнийх нь нэр зарлагдах бол хэмээн сэтгэл барьж ядан, догдлон зогсцгоодог. Энэ жилийн хувьд ч мөн л адил хэн хийж бүтээсэн зүйлтэй, нэр хүндтэй бас чадварлаг байсан нь шилдгээр тодорно гэдэгт итгэлтэй байна.
     
    Ярилцлагынхаа төгсгөлд танд хөөрхөн хүүтэй болсонд нь халуун баяр хүргээд, энэ жилийн “ТОП МОДЕЛЬ” болно хэмээн олон арван уншигчид маань итгэл дүүрэн байгааг уламжлаад нийт уншигчдынхаа өмнөөс амжилт бүхний дээдийг хүсье.
     
    Надад итгэж, чинь сэтгэлээсээ дэмжиж, цаг ямагт хамтдаа байдаг хайртдаа болон хөөрхөн хүүдээ, мөн нийт уншигчиддаа маш их баярлалаа гэж хэлмээр байна. Би та бүхнийхээ итгэлийг алдахгүй нь тулд улам бүр хичээж монголынхоо загварын ертөнцийн нэрийг дэлхийд тунхаглах болноо гэж ам бардам хэлье дээ. Баярлалаа.