Их Британид маргааш болох дуудлага худалдаагаар Ливерпулийн алдарт Битлз хамтлагийг үндэслэгч Жон Леноны долдугаар ангид байх үед багшийн нь түүний талаар бичиж өгч байсан анхааруулга бүхий дэвтрийг худалдаалах гэж байна. Сургуульд засвар хийж байсан ажилчдын санамсаргүй олсон 1950-иад оны багшийн энэ журналд хожмын дэлхийн од, залуу Жон Леноныг сургууль дотор биеэ зохисгүй авч явдаг, сургуулийн дотоод дүрэм байнга зөрчин багш ажилтнуудтай зүй бус харьцдаг хэмээн бичсэн байна. Британийн сургуулиуд ийм хар тэмдэглэгээ хийж, хоёр дахиа бичүүлбэл эцэг эхийг нь сургууль дээр дуудан ирүүлдэг байсан байна. Харин алдарт Жон Ленон нэг удаа өдөрт гурван ч ийм анхааруулга авч байсан нь хуучны энэ журналд тэмдэглэгдэн үлджээ. 1955 оны арваннэгдүгээр сарын 25-нд гэхэд л хичээл дээр ярьсан хэмээн бичсэн бол 29-ний өдөр дараалаад хоёр анхааруулга авч, арванхоёрдугаар сарын 6-нд зэргэлдээ ширээний сурагчтай зодолдсон, хичээл дээр хашгирч, бас бохь зажилсан хэмээн бичсэн байгаа гэнэ.
Жон Ленон Куоррибенк сургуульд 1952 онд орж суралцаж байх хугацаандаа уран сайхны хичээлүүдэд илүү анхаарч авьяаслаг байсан ч ерөнхий эрдмийн хичээлүүдэд тааруухан байсан гэдэг.
Ливерпулийн алдарт дөрвөл Битлзийн хөгжимчин Жон Леноны амьдралын сонин баримт бүхий энэ журналыг TracksAuction танхимын онлайн дуудлага худалдааны маргаашийн худалдаагаар 6000 фунт стерлингээс эхлэн худалдах юм байна.
