Олон улсын хэмжээний ой тогтоолтын нээлттэй тэмцээн Хонконг улсад өнгөрсөн сарын 28-30-ны өдөр болжээ. Эл тэмцээнд 11 орны 110 тамирчин ой тогтоолтын арван төрлөөр өрсөлдсөнөөс Филиппин улс тэргүүлж, Монгол Улсын баг тамирчид хоёрдугаар байр эзэлсэн байна. Энэхүү тэмцээнд манай улсаас бага, дунд, насанд хүрэгчдийн ангилалд 10 тамирчин өрсөлдсөнөөс 18 алт, зургаан мөнгө, 15 хүрэл нийт 39 медаль хүртэж багаараа хоёрдугаар байрт шалгарлаа. Эл тэмцээний дунд насны ангилалд хоёр алт, зургаан мөнгө, нэг хүрэл медаль хүртсэн Б.Намуунтуул насанд хүрэгчдийн ангилалд оюун ухаанаа сорьж, нэг алтан медаль хүртсэн байна.  Түүний энэ амжилт  дэлхийн чансаанд 1700 гаруй тамирчнаас 51-д бичигдэж байгаа юм. Эдгээр тамирчныг ирэх арваннэгдүгээр сард Их Британи улсын Лондонд болох ой тогтоолтын дэлхийн аваргын тэмцээн хүлээж байна.