Монголын зохиолчдын Их хурал өнгөрсөн баасан, бямба гарагт болж өндөрлөлөө. Өнгөрсөн дөрвөн жилийн тайлангаа хэлэлцэж, ирэх дөрвөн жилд Монголын зохиолчдын эвлэл /МЗЭ/-ийг удирдах бүрэлдэхүүнийг сонгох тус хурал нэлээд ширүүхэн уур амьсгалтай болжээ.
Эхний өдрийн хурлаар одоогийн удирдлагуудын үйл ажиллагааг ширүүхэн шүүмжилж, хийсэн зүйлгүй атал ирэх жилүүдэд хийх ажлын төлөвлөгөөгөөрөө зохиолчдыг хуурах гэж оролдлоо хэмээн дургүйлхсэн юм. Харин хоёр дахь өдрийн хурал арай намдуу үргэлжилж, шөнө дөл хүртэл хуралдаад МЗЭ-ийн Удирдах зөвлөлийн гишүүдийг сонголоо. Хурлын шийдвэрээр удирдах зөвлөлийн даргаар зохиолч Ц.Буянзаяаг сонгожээ. Шинээр сонгогдсон Удирдах зөвлөл ойрын хугацаанд хуралдаж, МЗЭ-ийн гүйцэтгэх захирлыг томилох аж. Өдгөө тус эвлэлийг яруу найрагч Г.Мөнхцэцэг удирдаж байгаа билээ. Харин түүнийг улираан томилох уу, өөр хүнээр солих уу гэдгийг Ц.Буянзаяа тэргүүтэй шинэ багийнхан шийднэ.
