“Надтай гэрлээч”, “Зөрлөг”, “Дэлхийд дурласан сар” гээд олон кино найруулж, “Миний муу аав”, “Хоёр хоёрын тав” кино зохиолыг бичсэн найруулагч, жүжигчин С.Баттулгатай фейсбүүк хуудсаар холбогдлоо.

-Сайн байна уу.  Таниас цөөн хэдэн зүйл асуух гэсэн юм аа?
-Сайн, сайн байна уу. Асуу л даа.
-Та өөрийн фейсбүүк хуудсаа идэвхитэй хөтлөх юм аа?
-Тийм шүү. 2010 оноос хойш фейсбүүк хуудсанд нэгдээд өнөөдөр 4067 найзтай болсон байна. Өөрийн уран бүтээлээ сурталчлах, найз нөхөдтэйгөө бодол саналаа хуваалцах, хүмүүсийн оруулж байгаа постуудаас санаа авах гээд надад их өгөөжтэй шүү.
-Ингэхэд саяхан “хатуухан” пост үлдээсэн байсан. Ямартаа ч шинэ уран бүтээлээс тань болжээ гэж ойлгосон?
-“Хэлсэн ярьсандаа хүрдэггүй, замын дундаас явдаг нөхдийг ойлгохгүй юм... Дараа таарахдаа миний хийснийг хараад атаархал чинь буцлах болно. Эр хүн зовох тусмаа чангарч эрдэнийг чулуу зүлгэх тусмаа өнгө ордог гэж үг бий...” гээд үү. Энэ талаар хүмүүс их асуусан. Хүмүүс ер нь нэгнийхээ мууд дурладаг гэж үнэн шүү. Юун тухайг нь хэлчихвэл хэрүүл хийсэн болчих биз. Гэхдээ энэ уран бүтээлийн  талаар биш.
-Та ингэхэд хөгжилтэй дүр их бүтээдэг шүү дээ. Амьдрал дээр хэр ууртай хүн бэ?
-Кино урлагт дурлаад “сохорсон” хүн. Кино урлагийн төлөө яахаас ч буцахгүй. Гэхдээ гэртээ бол сайн аав, сайн хань. Уурлах чинь олон янз. Ажлын явцад уцаарлах зүйл гарах ч уурлаад л яваад байдаг хүмүүсээс огт өөр шүү би.
-Шинэхэн уран бүтээлийнхээ талаар сонирхуулаач?
-Арай эрт байна. “Herub” энтертайментын бүтээл тун удахгүй үзэгчдэд хүрнэ.