Дельфинийг хамгийн ухаантай амьтан гэдэг. Тэд хоорондоо ярих мэт ойлголцдог болохыг саяхан судалгаагаар баталсан. Тэгвэл тэрхүү судалгааны ололтыг бүр лавшруулсан нэгэн баримтыг эрдэмтэд гаргаж тавиад байна. Дельфинүүд бие биенээ дуудах онцгой дохиотой байдаг гэнэ. Үүнийг тэдний нэр ч гэж хэлж болно. Өөрийнхөө дохиог олж сонссон дельфин хариу дохио өгч байгаагаас үүнийг тодорхой харж болно гэж Шотландын Гэгээн Эндрьюсийн сургуулийн судалгааны баг мэдэгдэж байна. Дельфинүүд зөвхөн өөрийн хүрээнийхний нэрийг сайн мэдэх учир танихгүй дельфиний дохио дуудлагад хариу өгдөггүй байна. Ихэнх хөхтөн амьтан нэгнээ харах юм уу үнэрлэх зэрэг мэдрэмжээрээ биеэ биеэ танидаг ч усан дор энэ нь боломжгүй тул дельфин шиг дуудлага дохиогоор нэгнээ танидаг байх гэж судлаачид үзэж байна.