Монголын балетчид дэлхийн тайзнаа бүжиж, монголын тайзнаа дэлхийн сонгодог тавигдсаар. Энэ л эрчимтэй хөгжсөн балетийн урлагийг харуулах бүрэн хэмжээний кино дэлгэцнээ амилах гэж байна. Уг кино манай балетчид гадаадад хэр зэрэг нэр хүндтэй байдгийг харуулахаар зорьж буй ажээ. Гол дүрийн залууд “Бостон балет” компанийн гоцлол бүжигчин, гавьяат жүжигчин Д.Алтанхуяг тоглохоор болсон байна. Найруулагчаар нь Т.Алтантуяа, В.Агар нар ажиллах гэнэ. Хоёр найруулагчийн хувьд хамгийн сүүлд хийсэн “Ану хатан” киногоороо үзэгчдийн магтаалыг ихээхэн хүлээгээд авсан. Хэдийгээр киноны зохиол хараахан бичигдэж дуусаагүй байгаа ч Монголын сонгодог урлаг болон балетын бүжигчдийн дотоод ертөнц, эгэл амьдралыг харуулсан кино байдаггүй учраас кино багийнхан энэ сэдвийг онцлон сонгожээ. Кино багийхан балетын гайхамшигт элементийг харуулж чадахуйц график дизайныг толилуулах гэнэ. Зураг авалт нь энэ намраас эхлэхээр төлөвлөгдсөн ч гол дүрийн бусад жүжигчдээ сонгоогүй байгаа юм байна.
