УДБЭТ-ын алтан тайзнаа Ж. Россинигийн “Севилийн үсчин” хоёр бүлэг, дөрвөн үзэгдэлт хошин дуурь энэ сарын 29-нд амилах гэж байна. Анх Италид 1916 оны хоёрдугаар сарын 20-нд нийтэд тоглогдсон эл хошин дуурь манай улсад 1979 оны аравдугаар сарын 13-нд алтан тайзнаа амилсан гэдэг. Энэхүү дуурийн удирдаачаар УГЗ Н.Туулайхүү, найруулагч Л.Эрдэнэбулган ажиллаж буй. Харин гол дүрийн Альмавива гүнд (тенор) СТА Ч.Түмэндэмбэрэл, Розинад Ө.Уянга, Үсчин залуу Фигарод (баритон) А.Сайнбаяр нарын уран бүтээлчид тоглоно. XVIII зууны үед Испанийн Севиль хотод буйгаар эхлэх хошин дуурьт хайр сэтгэлийг нь булаасан үзэсгэлэн төгс Розинад дурласан Альмавива гүн “Миний хэргэм зэрэг, эд хөрөнгөнд минь биш, надад үнэн хайр сэтгэлээ өгөөсэй" гэсэндээ өөрийгөө Линдор гэж танилцуулснаар үйл явдал эхэлнэ. Тэрээр бэрхшээлийг даван туулснаар хайртай бүсгүйтэйгээ гэрлэн амар сайхан жаргаж суудаг тухай өгүүлсэн хоёр цаг 20 минутын хошин дуурь юм.
