УИХ-ын гишүүн Л.Болдын өмгөөлөгч З.Сүхбаатарын Голомт банктай холбоотой “Үндэсний шуудан” сонинд нийтэлсэн захидлын мөрөөр Голомт банкны засаглал, гүйцэтгэх удирдлагын талаар Компанийн засаглалын хөгжлийн төвийн гүйцэтгэх захирал Ж.Үнэнбат тус банкны ТУЗ-ийн хараат бус гишүүний хувьд ямар бодолтой байгааг бид сонирхлоо.


-Голомт банкны засаглалыг ТУЗ-ийн хараат бус гишүүний хувьд хэрхэн үзэж байна вэ?
-Голомт банк бол гол хувь нийлүүлэгчээс гадна гадаадын хөрөнгө оруулалттай, тэдгээрийн болон ажиллагсдын төлөөлөл ТУЗ-ийн бүрэлдэхүүнд орж ажилладаг, хараат бус гишүүнтэй, ТУЗ нь банкны гүйцэтгэх удирдлагын үйл ажиллагааг чиглүүлж, хяналт тавьж чаддаг, компанийн засаглалын хууль тогтоомжийн шаардлагыг хангаад зогсохгүй олон улсын тэргүүн туршлагын нэвтрүүлж байгаа засаглалын сайн тогтолцоотой банк гэдгийг юуны өмнө хэлмээр байна. Эцсийн дүндээ засаглалын энэхүү тогтолцоогоор дамжин банк харилцагч хадгаламж эзэмшигчдийн эрх ашиг хамгаалагдаж, Монгол Улсын тэргүүлэгч банкны нэг болсон.  

-Тэгвэл гүйцэтгэх удирдлагын тухайд?
-Голомт банкны гүйцэтгэх удирдлага ТУЗ-өөс өгсөн чиглэл, зөвлөмжийн дагуу ажиллаж банкны өсөлт, Монголбанкнаас тавигддаг шаардлагыг бүрэн ханган ашигтай ажиллуулж байгаа гэж үздэг. Мэдээж гүйцэтгэх удирдлагын үнэлгээний асуудал нийт ТУЗ-д хамааралтай хэдий ч банкинд ажилласан туршлага, ур чадвар, ёс зүйн талаасаа өнөөгийн удирдлагын амжилт нь Голомт банкны өсч хөгжсөн амжилттай салшгүй холбоотой гэдэгт итгэл төгс байна.

-Голомт банкны хувь нийлүүлэгч Л.Болдын өмгөөлөгчөөрөө дамжуулж сонинд өгсөн нийтлэлийн хувьд та ямар бодолтой байна вэ?
-Юуны өмнө Голомт банкны өнөөгийн гүйцэтгэх удирдлагын үйл ажиллагаатай холбогдох асуудал банкны ТУЗ дээр яригдаагүй. Харин хувь нийлүүлэгч Бодь интернэйшнл компанийн хувьцаа эзэмшигчдийн хооронд маргаантай асуудал байгаа болов уу.  Үүнийг Голомт банктай, түүний удирдлагатай, үйл ажиллагаатай холбогдуулж нялзаах ямар ч шаардлага байхгүй.   Тэдний асуудлыг шийддэг газар нь тусдаа.