Үндэсний агаарын тээвэрлэгч МИАТ төрийн өмчит компанийн өөрийн гэсэн анхны шинэ “Боинг-767” онгоц өнөөдөр 10:00 цагт “Чингис хаан” олон улсын нисэх буудалд газардах юм. АНУ-ын Сиэтл хотод захиалгаар үйлдвэрлүүлсэн эл онгоцыг хүлээлгэн өгөх ёслолд оролцохоор Монголын талаас салбарын яам болон холбогдох байгууллага, хэвлэлийнхнээс бүрдсэн 30 гаруй төлөөлөгч явсан билээ. Тууз хайчлах ёслолд Зам тээврийн яамны Төрийн нарийн бичгийн дарга Б.Батзаяа, МИАТ компанийн гүйцэтгэх захирал Г.Жаргалсайхан, ИНЕГ-ын дарга С.Буяндалай, “Боинг” компанийн Бизнес эрхэлсэн захирал Андре Муллан, тус компанийн “767” төслийн ерөнхий инженер Стефен Уэлсс нар оролцсон байна.
Будаг нь ханхалсан шинэхэн хөлгийн анхны багийн гишүүдэд онгоцны дарга Ж.Доржнамжим, багш нисгэгч Г.Мөнх-Очир, хоёрдугаар нисгэгч А.Энхжаргал, ахлах үйлчлэгч Д.Мөнх-Үйлс, үйлчлэгч Б.Үүрийнтуяа нар багтаж, “Боинг-767”-гоо Монголд авчрах хүндтэй үүрэг хүлээжээ. Зам тээврийн сайд А.Гансүх 2011 онд өмнөх Засгийн газрын дэд сайд байхаасаа эхлэн агаарын тээврийн бодлогыг гардан хариуцаж, улмаар УИХ-аар бодлогоо батлуулж, МИАТ-ийг Үндэсний агаарын тээвэрлэгч болгоод зогссонгүй, орчин үеийн аварга том хөлөгтэй болгосон нь энэ.